वणी (जि. यवतमाळ) प्रतिनिधी – दिनेश रायपुरे
सध्या देशात अपघात, घातपात आणि राजकीय आरोप-प्रत्यारोप यांचं गडद सावट पसरलेलं असताना, वणी येथील ज्येष्ठ सामाजिक विचारवंत दत्ता डोहे यांनी एक अत्यंत मार्मिक व वास्तवाशी भिडणारा लेख प्रसिद्ध केला आहे. ‘देश अपघाताचा, सरकार घातपाताचं, राजकारण आरोप-प्रत्यारोपाचं’ या शीर्षकातून त्यांनी सध्याच्या अस्वस्थ समाजस्थितीवर परखड भाष्य केलं आहे.
लेखामध्ये त्यांनी अनेक महत्त्वाचे मुद्दे उपस्थित केले आहेत:
- धर्म, जात आणि वर्ग संघर्षांचे राजकारण: देशात हिंदू-मुसलमान, आदिवासी-दलित अशा द्वेषमूलक मुद्द्यांवर सतत वाद निर्माण करून, राजकीय नेतृत्व जनतेचे मूलभूत प्रश्नांपासून लक्ष हटवते आहे.
- शहरीकरण व ग्रामीण ऱ्हास: शहरांच्या विकासासाठी सर्व निधी केंद्रित होत असताना ग्रामीण भाग, शेती आणि स्थानिक उद्योग दुर्लक्षित होत आहेत. त्यामुळे गावांची भरती शहरात होत असून, यामुळे वाहतुकीचे अपघात वाढत आहेत.
- राजकीय निष्क्रियता आणि प्रशासनाची अरेरावी: गेली तीन वर्षे स्थानिक स्वराज्य संस्थांच्या निवडणुका न झाल्यामुळे लोकशाहीची पातळी धोक्यात आली आहे. तर अधिकारी वर्ग नागरिकांशी अरेरावीने वागत असून, त्यांच्यावर कोणताही अंकुश राहिलेला नाही.
- राहुल गांधींच्या पत्रावरून मतमोजणी प्रक्रियेतील शंका: निवडणूक प्रक्रियेत अचानक मतदार संख्येत वाढ आणि याबाबत इलेक्शन विभागाऐवजी मुख्यमंत्री उत्तर देत असल्याचे नमूद करत लेखात पारदर्शकतेवरील प्रश्न उपस्थित करण्यात आले आहेत.
- साहित्यिकांची सामाजिक मौनव्रती: डोहे यांनी खंत व्यक्त करत सांगितले की, समाजात इतकी अस्थिरता असतानाही आजचे साहित्यिक, विचारवंत आणि प्रबोधनकार सामाजिक भूमिकेपासून दूर आहेत.
शेवटी, डोहे यांनी आधुनिक विचारवंतांना आवाहन केले आहे की त्यांनी निष्पक्ष भूमिका घेऊन समाजाला दिशा देणारा मार्ग शोधावा, जसे की संत साहित्याने पूर्वी दिला होता.
संपर्क:
दत्ता डोहे,
वणी, जि. यवतमाळ. मो:- 96899 40507
