▪️खंडणी मागणाऱ्यावर राज्य पातळीवरील कारवाईची तयारी..
वणी (प्रतिनिधी): वणी शहरातील प्रतिष्ठीत व्यावसायिक विजयकुमार पारसमल चोरडिया यांच्या मालकीचे मौजा गणेशपूर येथील छोरिया लेआउटमधील घरावर समीर परवेज रफीक रंगरेज, त्याचा साळा व इतर दोघांनी मिळून अवैधरित्या ताबा घेण्याचा प्रयत्न केला. ताबा सोडण्यासाठी त्यांनी चोरडिया यांच्याकडे ३ लाख ५० हजार रुपयांची खंडणी मागितली.
अचानक घडलेल्या या प्रकारानंतर चोरडिया यांनी तात्काळ वणी पोलिस स्टेशनला धाव घेऊन अवैध प्रवेश व खंडणी प्रकरणी गुन्हा दाखल करण्याची मागणी केली. समीर रंगरेज याच्या भूतकाळातील गुन्हेगारी इतिहासानुसार, ताबा घेणे, मालमत्ता बळकावणे व खंडणी मागणे हा त्याचा मुख्य धंदा असून, यापूर्वीही त्याच्यावर वणी पोलीस स्टेशनमध्ये गुन्हे दाखल आहेत.
चोरडिया आपल्या सहकाऱ्यांसह घरात प्रवेश करण्यासाठी गेले असता, रंगरेज याने पत्नी व साळ्याच्या पत्नीला पुढे करून अडवण्याचा प्रयत्न केला तसेच महिलांच्या माध्यमातून फसविण्याची धमकी दिली. पोलिसांनी तातडीने घटनास्थळी पोहोचून सर्वांना पोलिस स्टेशनला आणले. अखेरीस दोन्ही पक्षांमध्ये समझोता झाला असून, रंगरेज याने माफी मागून भविष्यात असे कृत्य न करण्याचे आश्वासन दिले व घराच्या चाव्या चोरडिया यांच्या ताब्यात दिल्या.
दि. १० ऑगस्ट रोजी पत्रकार परिषदेत बोलताना विजय चोरडिया यांनी सांगितले की, माझ्यासारख्या प्रतिष्ठीत व्यावसायिकाच्या घरावर जर गुंड प्रवृत्तीने ताबा होत असेल, तर सर्वसामान्य जनतेसोबत काय घडत असेल, याची कल्पना करावी. या प्रकरणी मोठ्या कारवाईकरिता राज्य पातळीवरील कारवाई केली जाईल.
