▪️ रेतीचे तस्करीत गुन्हेगारी पार्श्वभूमी असलेले बाहेरगावचे गुंडचा सहभाग..
वणी – तालुक्यातील अवैध रेती तस्करी आणि साठवणुकीचा प्रकार मोठ्या प्रमाणावर सुरू असून, शहरातील ले-आउट आणि शासकीय गोदाम परिसरातही रेती साठवली जात असल्याची चर्चा आहे. स्थानिक प्रशासनाच्या भूमिकेवर प्रश्नचिन्ह निर्माण झाले आहे, कारण या सर्व प्रकारांकडे जाणीवपूर्वक दुर्लक्ष केले जात असल्याचा आरोप आहे.
तालुक्यातील अधिकृत रेती घाट बंद असल्यामुळे सामान्य नागरिकांना रेती मिळवणे कठीण झाले आहे, मात्र काही बिल्डर आणि जमीन मालक मोठ्या प्रमाणात अवैध रेती साठवून ती जास्त दराने विकत असल्याचे उघड झाले आहे. स्थानिक अधिकाऱ्यांशी संगनमत करून हा व्यवसाय सुरू असल्याचेही बोलले जात आहे.
परंतु वणी तालुक्यात रात्रीच्या वेळी खुलेआम अवैध रेती तस्करी सुरू असून, या तस्करीत गुन्हेगारी पार्श्वभूमी असलेले बाहेरगावचे गुंडही सहभागी होत आहेत. यामुळे शहरात मोठे घातपात होण्याची शक्यता निर्माण झाली आहे.
यासंदर्भात महसूल प्रशासन चौकशी करून ले-आउट मालक आणि इतर जबाबदार व्यक्तींवर कारवाई करणार का, हा महत्त्वाचा प्रश्न उपस्थित होत आहे. जिल्हा पातळीवरील वरिष्ठ अधिकाऱ्यांनी यात लक्ष घालून कारवाई करावी, अशी मागणी आता नागरिक आणि काही स्थानिक माध्यमांकडून होत आहे.
