वणी (प्रतिनिधी) – वणी शहरातील अनेक प्रमुख रस्त्यांची अवस्था अत्यंत खराब झाली असून, खड्ड्यांमुळे नागरिकांचे हाल सुरू आहेत. उपविभागीय अधिकारी निवासस्थानासमोरील रस्त्यावर मोठा खड्डासारखा (गचका) पडलेला असून, पावसाळ्यात त्यात पाणी साचल्याने तो (गचका) दिसत नाही. याच ठिकाणी सा.बा. उपविभागीय कार्यालय आणि त्यासमोर माजी आमदार यांचे निवासस्थान असून, तरीही रस्त्यांकडे दुर्लक्ष केल्याचे चित्र आहे.
खड्ड्यांमुळे गरोदर महिलांना मोठ्या प्रमाणात त्रास सहन करावा लागत आहे. काही प्रकरणांमध्ये गर्भपात (मिसकॅरेट) झाल्याचेही निदर्शनास आले आहे. यामुळे ‘या दुर्दैवी घटनांसाठी जबाबदार कोण?’ असा सवाल नागरिक विचारत आहेत. विशेषतः नवविवाहित महिलांना याचा गंभीर फटका बसत असून, अनेक कुटुंबांत संताप व्यक्त केला जात आहे.
शहरातील दीपक चौपाटी पोलिस चौकी ते जंगलीपीर दर्गा दरम्यान रस्ता संपूर्ण खड्ड्यांनी भरलेला असून, वाहतुकीला अडथळा निर्माण होत आहे. या रस्त्यांच्या दुरवस्थेवर कोणतीही कारवाई न करता उलट दुरुस्तीचे बिले काढण्यात आल्याची चर्चा जनतेत सुरू आहे.
या पार्श्वभूमीवर नागरिकांनी संबंधित विभागीय अधिकाऱ्यांनी तत्काळ पाहणी करून रस्त्यांची डागडुजी करावी, अशी जोरदार मागणी केली आहे. दरम्यान, अशा गंभीर प्रश्नावर स्थानिक राजकारणी नेते गप्प का आहेत? असा प्रश्न सामान्य जनतेकडून विचारला जात आहे.
