वणी (प्रतिनिधी) – शेतकरी, शेतमजूर, बेरोजगार, वीज ग्राहक, महिला अत्याचार आणि वणी व परिसरातील नागरी समस्यांबाबत काँग्रेस तर्फे भव्य धरणे आंदोलन आयोजित करण्यात आले आहे. हे आंदोलन बुधवार, 23 जुलै 2025 रोजी सकाळी 11 वाजता वणी तहसील कार्यालयासमोर होणार असून, वणी, मारेगाव आणि झरी तालुका काँग्रेस यामध्ये सहभागी होणार आहे.
या आंदोलनाचे समन्वयक काँग्रेसचे जिल्हा सरचिटणीस संजय खाडे असून त्यांच्या नेतृत्वाखाली हे आंदोलन होणार आहे. त्यांनी वणी उपविभागातील सर्वसामान्य नागरिकांना या आंदोलनात सहभागी होण्याचे आवाहन केले आहे.
मुख्य मागण्या:
- वीज बिल माफ करणे आणि सातत्याने वीज पुरवठा करावा
- शेतकऱ्यांची कर्जमाफी व पिकांना हमीभाव द्यावा
- महिलांवरील अत्याचारावर कठोर शासन
- वणी व परिसरातील पाणीपुरवठा व नागरी समस्या तात्काळ सोडवाव्यात
- बेरोजगारांच्या प्रश्नांचे निराकरण करावे
वणी उपविभागात शेतकऱ्यांना अतिवृष्टीमुळे झालेल्या नुकसानीसोबतच वीज व पाणीपुरवठ्याच्या गंभीर समस्यांना सामोरे जावे लागत आहे. शहरात 8-8 दिवस पाणीपुरवठा होत नाही, घाणीमुळे आरोग्याचा प्रश्न निर्माण झाला आहे. अनेक निवेदने दिल्यानंतरही प्रशासनाने या समस्या सोडविण्यात अपयश आले आहे.
म्हणूनच नागरिकांच्या हक्कासाठी हे धरणे आंदोलन आयोजित करण्यात आले आहे.
