▪️ डॉ. बाबासाहेब आंबेडकरांच्या विचारांचा वारसा जपा – रमेश बोबडे यांचे विद्यार्थ्यांना मार्गदर्शन..
वणी (प्रतिनिधी) – आर्थिक अडचणींमुळे शिक्षणापासून वंचित राहणाऱ्या विद्यार्थ्यांना आधार देण्यासाठी वणीतील स्माईल फाउंडेशन ने उल्लेखनीय पाऊल उचलले आहे. फाउंडेशनतर्फे तालुक्यातील अनाथ, दिव्यांग, आत्महत्याग्रस्त कुटुंबातील, पितृछत्र हरवलेल्या तसेच गरजू अशा १०० विद्यार्थ्यांना शैक्षणिक साहित्याचे वाटप करण्यात आले. हा उपक्रम २४ जुलै रोजी संध्याकाळी ६ वाजता स्थानिक विठ्ठल-रुक्मिणी सभागृहात संपन्न झाला. कार्यक्रमात दिवंगत दिलीप कोरपनेवार यांना आदरांजली अर्पण करण्यात आली.
स्माईल फाउंडेशनने या विद्यार्थ्यांचे शैक्षणिक पालकत्व स्वीकारले असून त्यांना शालेय पुस्तके, बॅग, एक्झाम बोर्ड, वॉटर बॉटल, पेन, पेन्सील आदी साहित्य वितरित केले. पहिली ते बारावीपर्यंतच्या विद्यार्थ्यांचा या उपक्रमात समावेश होता. वाटप सोहळ्यास ज्योती नगरवाला, चंद्रकला मुथा, रजिया काठेड, सुरेश बनसोड, बालाजी मिलमिले आणि राष्ट्रपती पुरस्कार विजेते रमेश बोबडे उपस्थित होते.
रमेश बोबडे यांनी मार्गदर्शन करताना डॉ. बाबासाहेब आंबेडकर यांच्या विचारांचा वारसा पुढे नेण्याचे आवाहन केले. त्यांनी सांगितले की, “शिक्षणामुळे यशाचे शिखर गाठता येते, त्यामुळे पालकांचे स्वप्न पूर्ण करण्यासाठी मेहनत घ्या,” असे ते म्हणाले.
हा उपक्रम यशस्वी करण्यासाठी स्माईल फाउंडेशनचे अध्यक्ष सागर जाधव यांच्यासह पीयूष आत्राम, आदर्श दाढे, विश्वास सुंदराणी, उत्कर्ष धांडे, खुशाल मांढरे, तन्मय कापसे, गौरव कोरडे, दिनेश झट्टे, कुणाल आत्राम, कार्तिक पिदूरकर, सचिन काळे, रोहित ओझा, तुषार वैद्य, युग, सचिन भोयर यांनी परिश्रम घेतले.
दानशूरांना आवाहन
हा उपक्रम वर्षभर सुरू असून गरजू विद्यार्थ्यांच्या शिक्षणात खंड पडू नये यासाठी शालेय साहित्य, वस्तू, रोख किंवा धनादेश स्वरूपात मदत करता येते. देणगी वॉटर सप्लाय परिसरातील कार्यालयात स्वीकारली जाते. अधिक माहितीसाठी संस्थेचे अध्यक्ष सागर जाधव – 7038204209 यांच्याशी संपर्क साधावा, असे आवाहन करण्यात आले आहे.
