वणी (प्रतिनिधी) – वणी ग्रामीण रुग्णालयातील ट्रॉमा केअर बाह्यरुग्ण विभागाकडे जाणारा अंदाजे तीन फूट रस्ता पाण्याने भरून गेल्याने रुग्णांना रुग्णालयात पोहोचणे कठीण झाले आहे. पावसामुळे आणि जलनिकासी व्यवस्थेअभावी हा मार्ग पूर्णपणे अडथळलेला असून, गंभीर रुग्णांना वेळेत उपचार मिळण्यात अडचणी येत आहेत.
ही दयनीय परिस्थिती असताना संबंधीत प्रशासनाकडून अद्याप कोणतीही ठोस कार्यवाही झालेली नाही. रुग्णालयाचे वैद्यकीय अधीक्षक डॉ. सुलभेवार यांनी रुग्णलय कर्मचाऱ्यांना घेवून स्वतः पाणी जाण्यासाठी नाली काढण्याचे काम हाती घेतले, ही बाब परिस्थितीची गंभीरता दर्शवते.
स्थानिक नागरिक आणि रुग्णांनी प्रशासनाला तातडीने मार्ग मोकळा करण्याची व जलनिकासीची व्यवस्था सुधारण्याची मागणी केली आहे. विद्यमान आमदार, माजी आमदार “फक्त स्वातंत्र्य दिन साजरा करून चालणार नाही, प्रत्यक्ष समस्या सोडवाव्यात” असा जनतेचा सूर आहे.
