वणी/पांढरकवडा (दि. १८ सप्टेंबर) – मौजा ब्राम्हणी (ता. वणी, जि. यवतमाळ) येथे स्वतःच्या जन्मदाती आईवर बलात्कार करणाऱ्या आरोपी राकेश दत्तू काळे (वय २६) यास सत्र न्यायालय, पांढरकवडा यांनी जन्मठेपेची शिक्षा ठोठावली आहे.
ही घटना जुलै २०२१ मध्ये घडली होती. पिडित आईवर आरोपीने वारंवार मारहाण करून, दारूच्या नशेत धमकावत अश्लील व्हिडिओ दाखवून रात्रीभर जबरदस्तीने बलात्कार केला. या घटनेनंतर पीडितेने आत्महत्येचा प्रयत्न केला. शुद्धीवर आल्यानंतर तिने वणी पोलिसात तक्रार दाखल केली होती.
वणी पोलिसांनी गुन्हा नोंदवून तपास पूर्ण केल्यानंतर दोषारोपपत्र सत्र न्यायालय, केळापूर येथे दाखल करण्यात आले. अतिरिक्त शासकीय अभियोक्ता अॅड. रमेश डी. मोरे यांनी ८ साक्षीदार तपासून आरोपीविरुद्ध ठोस बाजू मांडली.
न्यायालयाने आरोपीस खालील शिक्षा सुनावल्या –
- भा.दं.वि. कलम ३७६(२)(एफ), ३७६(२)(एन): जन्मठेप व ₹१०,००० दंड
- कलम ३२३: १ वर्ष सश्रम कारावास व ₹१,००० दंड
- कलम ५०६: २ वर्ष सश्रम कारावास व ₹४,००० दंड
(दंड न भरल्यास अतिरिक्त शिक्षा)
सर्व शिक्षा एकत्र भोगण्याचा आदेश मा. न्यायाधीश अभिजित देशमुख (सत्र न्यायालय, पांढरकवडा) यांनी दिला. आरोपीची बाजू अॅड. सिद्धार्थ लोढा यांनी मांडली. पैरवी अधिकारी पो.हे.कॉ. संतोष मडावी (ब.नं. ७९२) यांनी कार्य केले.
