वणी (प्रतिनिधी) – वणी नगर परिषद निवडणुकीत प्रभाग क्रमांक ५ हा महिला आरक्षित असल्याने संभाव्य उमेदवार कोण असणार, याबाबत मतदारांमध्ये उत्सुकता वाढली आहे. तेली फैल, दामले नगर, सिंधी कॉलनी, भीमनगर यांसह इतर उपपरिसरांचा समावेश असलेल्या या प्रभागात काही नावांची चर्चा सुरू झाली आहे.
प्रभागात सोनाली प्रशांत निमकर यांचे नाव स्थानिक चर्चेत असल्याचे समजते. त्यांच्या पती छोटू निमकर यांनी २०१६ मध्ये नगरसेवक म्हणून कामकाज केले होते. त्यांच्या कार्यकाळातील प्रभागात काही विकासकामे तसेच नागरिकांशी असलेला संपर्क यामुळे प्रभागात निमकर कुटुंबाबद्दल चर्चा सुरू असल्याचे नागरिक सांगतात. त्यामुळे यंदा सोनाली निमकर संभाव्य उमेदवार म्हणून पुढे येऊ शकतात, अशी चर्चा आहे.
दरम्यान, माजी नगरसेविका अर्चना सुभाष ताजणे (रा. तेली फैल) यांचे नावही संभाव्य उमेदवारांच्या यादीत असल्याचे बोलले जाते. त्या कोणत्या पक्षातून निवडणूक लढवणार याबाबत अद्याप अधिकृत घोषणा नसली तरी स्थानिक स्तरावर त्यांच्या नावाचीही दखल घेतली जात आहे.
याशिवाय या प्रभागात इतर काही महिलांची नावेही अनौपचारिक चर्चेत आहेत, मात्र कोणतेही नाव अधिकृतरीत्या प्रसिद्ध झालेले नाही. त्यामुळे प्रभाग क्रमांक ५ मध्ये उमेदवारांच्या घोषणांपूर्वीच राजकीय हालचालींना वेग येत असल्याचे स्थानिक वर्तुळात बोलले जात आहे.
