▪️दामले नगरातून तब्बल २२ वर्षांनंतर नगरसेवक..
वणी (प्रतिनिधी): वणी शहरातील प्रभाग क्र. ५ अनुसूचित जाती आरक्षित जागेतून निवडून आलेले नगरसेवक रितिक लक्ष्मण मामीडवार यांचा आज दि. २७ डिसेंबर रोजी माजी नगराध्यक्ष सुरेश रायपुरे यांच्या हस्ते सत्कार करण्यात आला.
या प्रसंगी बोलताना रायपुरे म्हणाले की, दामले नगरातून तब्बल २२ वर्षांनंतर नगरसेवक निवडून आल्याने आनंद व्यक्त होत आहे. निमकर कुटुंबाच्या सहकार्यामुळे तसेच प्रभागातील नागरिकांनी दिलेल्या भरघोस पाठिंब्यामुळे रितिक मामीडवार यांची निवड झाली आहे. नागरिकांच्या गेल्या अनेक वर्षांपासून प्रलंबित असलेली विकासकामे पूर्ण होणे आवश्यक असून विशेषत: वार्डातील पाणीटंचाईची गंभीर समस्या तातडीने मार्गी लावावी, अशी अपेक्षा त्यांनी व्यक्त केली.
यावेळी रायपुरे यांनी नगरसेवक रितिक मामीडवार यांना अण्णाभाऊ साठे यांचे पुस्तक भेट देऊन तसेच शाल परिधान करून सत्कार केला. कार्यक्रमाला वार्डातील युवक मोठ्या संख्येने उपस्थित होते.
