वणी (प्रतिनिधी): अल्पवयीन पिडित बालिकेवर लैंगिक अत्याचार केल्याप्रकरणी आरोपीस २० वर्षे सश्रम कारावासाची शिक्षा ठोठावण्यात आली आहे. ही शिक्षा अतिरिक्त सत्र न्यायाधीश अभिजीत एम. देशमुख यांच्या केळापूर येथील न्यायालयात दिनांक २ जानेवारी २०२६ रोजी सुनावण्यात आली. ही घटना मौजा नायगाव, ता. वणी, जि. यवतमाळ येथील असून आरोपी हा पिडितेच्या घरासमोर वास्तव्यास होता. सायंकाळी पिडितेचे आई-वडील कामासाठी बाहेर गेल्याचा फायदा घेत आरोपीने पिडितेवर लैंगिक अत्याचार केला आणि कुटुंबास जीवे मारण्याची धमकी दिल्याने पिडितेने घटनेबाबत कोणास काही सांगितले नव्हते. नंतर तब्येत बिघडल्याने वैद्यकीय तपासणीदरम्यान पिडिता २० आठवड्यांची गर्भवती असल्याचे निदर्शनास आले. वैद्यकीय अधिकाऱ्यांनी दिलेल्या माहितीच्या आधारे अजनी पोलीस ठाणे, नागपूर येथे गुन्हा नोंद झाला. गुन्हा वणी पोलीस ठाण्याच्या हद्दीत घडल्याने तो वर्ग करण्यात आला. अपराध क्र. 626/2023 चा तपास सहाय्यक पोलिस फौजदार माया चाटसे यांनी केला. विशेष न्यायालय, केळापूर येथे दोषारोपपत्र दाखल करण्यात आले. अतिरिक्त शासकीय अभियोक्ता प्रशांत मानकर यांनी सात महत्त्वाचे साक्षीदार सादर केले. पिडितेचे जबाब, वैद्यकीय पुरावे व परिस्थितीजन्य पुराव्यांच्या आधारे न्यायालयाने आरोपीला दोषी ठरविले. न्यायालयाने खालीलप्रमाणे शिक्षा सुनावली – • POCSO कलम 6 अंतर्गत 20 वर्षे सश्रम कारावास व ₹10,000 दंड • POCSO कलम 4 अंतर्गत 10 वर्षे सश्रम कारावास व ₹7,000 दंड • भादंवि कलम 506 अंतर्गत 2 वर्षे सश्रम कारावास व ₹3,000 दंड सर्व शिक्षा एकत्रित भोगावयाच्या आदेश न्यायालयाने दिले आहेत. या प्रकरणात आरोपीची बाजू अॅड. हैदरी, वणी यांनी मांडली असून पैरवी अधिकारी म्हणून पो.ना. संतोष मडावी (ब. क्र. ७९२) यांनी काम पाहिले.
