वणी (प्रतिनिधी): वणी नगर परिषद निवडणूक २०२५ अंतर्गत प्रभाग क्रमांक ५ मध्ये दि. २२ व २३ नोव्हेंबर रोजी नगराध्यक्ष पदाच्या उमेदवार विद्या खेमराज आत्राम यांच्या प्रचारार्थ भाजपाचे नेते व माजी आमदार संजीवरेड्डी बोदकुरवार यांच्या नेतृत्वाखाली जोरदार, भव्य प्रचार राबविण्यात आला. प्रभागातील उमेदवार सोनाली प्रशांत निमकर (महिला गट) आणि रितिक मामिडवार (पुरुष आरक्षित SC गट) यांच्या समर्थनार्थ झालेल्या या प्रचाराला मतदारांकडून प्रतिसाद मिळत असून ढोल-ताशांच्या गजरात घेतलेल्या मतदार भेटींमुळे संपूर्ण प्रभागात उत्सवाचे वातावरण निर्माण झाले.
माजी आमदार संजीवरेड्डी बोदकुरवार यांनी तेली फैल, सिंघी कॉलनी, ग्रामीण रुग्णालय परिसर, भीमनगर, दामले नगर, शेतकरी मंदिर रोड या भागांत मोठ्या संख्येने नागरिकांशी संवाद साधत विविध विकासकामांची माहिती दिली.
काही ठिकाणी उमेदवार सोनाली प्रशांत निमकर यांचे नागरिकांनी घरासमोर उत्साहाने स्वागत केले. माजी नगरसेवक छोटू निमकर यांनी तेली फैल व परिसरातील केलेल्या विकासकामांचा उल्लेख करत मतदारांशी थेट संवाद साधला. त्यामुळे प्रभाग क्रमांक ५ मध्ये नगराध्यक्ष पदाच्या उमेदवार विद्या आत्राम व प्रभागातील उमेदवार सोनाली निमकर हे तेली फैल,सिंघी कॉलनी परिसरात आघाडीवर असल्याचे चित्र दिसत आहे.
या प्रचारात माजी नगराध्यक्ष तारेंद्र बोर्डे, शहराध्यक्ष अ‍ॅड. निलेश चौधरी, विलास निमकर, तसेच प्रभागातील माजी नगरसेवक छोटू निमकर यांच्यासह अनेक पदाधिकारी, कार्यकर्ते आणि समर्थक मोठ्या संख्येने सहभागी झाले.
