▪️नागरिकांनी गांजा तस्कऱ्यावर कारवाईची केली मागणी..
वणी : शहरात अलीकडे अमली पदार्थांचा वाढता सुळसुळाट चिंतेचा विषय ठरत आहे. ३१ मे रोजी स्थानिक गुन्हे शाखा यवतमाळ व वणी पोलिसांनी संयुक्त कारवाई करत यात्रा मैदान परिसरात एम.डी. ड्रग विक्री करीत असलेल्या एका आरोपीस रंगेहाथ अटक केली. या कारवाईमुळे काही प्रमाणात दिलासा मिळाला असला, तरी शहरातील इतर भागांमध्ये गांजाची खुलेआम विक्री सुरू आहे.
वर्धा, जाम, नागपूर अन्य मोट्या शहरातून गांजाचा पुरवठा होत असून, तो वणी शहरात खुलेआम विकला जात आहे. युवक वर्ग मोठ्या प्रमाणात या नशेच्या आहारी जात असून, त्यामुळे त्यांच्या आरोग्य व भविष्यावर गंभीर परिणाम होत आहे.
स्थानिक नागरिकांनी गांजा तस्करांवर कठोर कारवाईची मागणी केली आहे. “एम.डी. ड्रग्स विरोधात कारवाई झाली, पण गांजाच्या विक्रेत्यांकडे पोलिसांचे दुर्लक्ष का?” असा प्रश्न नागरिकांनी उपस्थित केला आहे.
शहरात संयुक्तिक मोहीम सातत्याने राबवून अमली पदार्थांचे समूळ उच्चाटन करावे, अशी जोरदार मागणी जनतेकडून केली जात आहे.
