निलजई (ता. वणी, जि. यवतमाळ): वेस्टर्न कोलफिल्ड्स लिमिटेड (WCL) निलजई प्रकल्पात स्थानिक युवकांना रोजगारापासून वंचित ठेवण्यात आल्याच्या निषेधार्थ भारतीय कम्युनिस्ट पक्ष, वणी तालुकातर्फे १६ ऑक्टोबर २०२५ रोजी ठिया आंदोलन तर १७ ऑक्टोबर २०२५ रोजी रास्ता रोको आंदोलन करण्यात आले.
ज्या भूमीवरून कंपनी कोळसा काढते, त्याच भूमीतील युवकांना रोजगार नाकारणे हा गंभीर अन्याय असल्याचे आंदोलनकर्त्यांनी सांगितले. काही जमिनीधारकांना नोकऱ्या देण्यात आल्या असल्या तरी भूमिहीन शेतमजूर युवकांना पूर्णतः दुर्लक्षित करण्यात आल्याची टीका करण्यात आली.
आंदोलनाचे नेतृत्व कॉम्रेड अनिल हेपट (वणी विधानसभा क्षेत्र), कॉम्रेड अनिल घाटे (जिल्हा सचिव), कॉम्रेड मोरेश्वर कुंटलवार (तालुका सचिव), कॉम्रेड अथर्व निवडींग (AISF जिल्हा प्रमुख), पंढरी मोहितकर, भास्कर बकली, संभाशिव ताजने आणि संतोष तीतरे यांनी केले.
“स्थानिकांना रोजगार द्या — बाहेरच्यांचा हस्तक्षेप थांबवा!” या घोषणांनी परिसर दुमदुमला. आंदोलनादरम्यान पोलिस प्रशासनाने दबाव आणण्याचा प्रयत्न केला, मात्र कॉम्रेड अनिल हेपट यांनी ठाम भूमिका घेत सांगितले —
“मागण्या मान्य करा, अन्यथा आमच्यावर गुन्हे दाखल करा; पण लढा थांबवणार नाही!”
शेवटी प्रशासनाला झुकावे लागले आणि स्थानिक युवकांच्या मागण्या मान्य करण्यात आल्या.
भारतीय कम्युनिस्ट पक्षाने स्पष्ट केले आहे की, स्थानिकांना रोजगार देणे हा दयेचा नव्हे तर हक्काचा प्रश्न आहे आणि हा लढा पुढेही सुरू राहील.
