वणी (प्रतिनिधी) : जिल्हा परिषद उच्च प्राथमिक शाळा, पळसोनी येथील नवीन इमारत बांधकाम काही महिन्यांपासून थांबले आहे. जुनी शाळा पाडल्यानंतर सध्याचे वर्ग विठ्ठल-रुख्माई मंदिरात भरवले जात असून विद्यार्थ्यांना शैक्षणिक वातावरण मिळत नाही.
मुख्याध्यापिका परसावार मॅडम यांचे प्रमोशन झाल्याने 6 व 7 वी साठी केवळ एकच शिक्षक उरला असून शिक्षणावर परिणाम होत आहे.
या पार्श्वभूमीवर ग्रामपंचायत व शाळा व्यवस्थापन समितीने गटविकास अधिकारी पंचायत समिती वणी यांच्याकडे निवेदन सादर करून थांबलेले बांधकाम तातडीने पूर्ण करावे व एक अतिरिक्त शिक्षकाची नेमणूक करावी, अशी मागणी केली आहे.
निवेदनावर सरपंच नलूताई दूधबळे, उपसरपंच पुखराज खैरे, शाळा व्यवस्थापन समितीचे अध्यक्ष संजय नाईक, उपाध्यक्ष सरिता साठे आदींच्या स्वाक्षऱ्या आहेत.
