वणी तालुक्यातील तरोडा येथील रहिवासी तथा सामाजिक कार्यात सक्रिय असलेले मधुकर नथ्थुजी जेऊरकर (वय ५६) यांचे हृदयविकाराच्या झटक्याने दुःखद निधन झाले.
मिळालेल्या माहितीनुसार, दि. २५ मे रोजी ते वेकोली निलजई खुल्या खदानीमध्ये रात्रपाळीच्या कर्तव्यावर होते. दरम्यान त्यांची प्रकृती अचानक बिघडल्याने दुसऱ्या दिवशी त्यांनी सोनबा देव मंदिर परिसरात आरामासाठी थांबले होते. मात्र शारीरिक त्रासाची तीव्रता वाढल्याने त्यांनी घरी निरोप दिला. त्यानंतर त्यांचा मुलगा आकाश उर्फ मारोती जेऊरकर यांनी त्यांना घरी आणले.
घरी विश्रांती घेत असताना पुन्हा छातीत तीव्र वेदना सुरू झाल्या. उपचारापूर्वीच दि. २६ मे रोजी सकाळी सुमारे ५:४५ वाजता त्यांची प्राणज्योत मालवली.
त्यांच्या पश्चात आई, पत्नी, मुली, मुलगा, बहीण असा मोठा आप्तपरिवार आहे. त्यांच्या निधनामुळे कुटुंबीयांवर तसेच नातेवाईकांवर दुःखाचा डोंगर कोसळला आहे.
स्व. मधुकर जेऊरकर हे जनकल्याणकारी स्वभावामुळे परिसरात सर्वपरिचित होते. त्यांच्या निधनाने सामाजिक क्षेत्रात हळहळ व्यक्त होत आहे.
त्यांच्यावर दि. २७ मे रोजी दुपारी १२ वाजता, मुलगी राजस्थान येथून आल्यानंतर अंतिम संस्कार करण्यात येणार आहेत.
