वणी – शहरातील दामले नगर, कब्रस्थान रोड, वसंत जिनींग गेट आणि राम शेवाळकर परिसर येथे रस्त्यांवर झुडपे आणि कचऱ्याचा ढीग साचला आहे. शिवरात्रीनिमित्त शिव मंदिरात कार्यक्रमांचे आयोजन करण्यात आले असले तरी, मंदिराकडे जाणाऱ्या मार्गावर घाणीमुळे नागरिकांना त्रास सहन करावा लागत आहे. विशेषतः रात्रीच्या वेळी नागरिक भयभीत होत आहेत.
शहरातील दलित वस्ती भागात मागील १० वर्षांपासून कोणतीही विकासकामे झाली नाहीत. नगरपालिकेत लोकप्रतिनिधी नसल्याने प्रशासनाचा मनमानी कारभार सुरू असून, बिल्डर आणि प्लॉट मालकांशी संगनमत करून निवडक भागांतच कामे केली जात असल्याचा आरोप होत आहे. दलित वस्त्यांकडे पूर्णतः दुर्लक्ष करण्यात आले असून, आरोग्य विभागाकडून कोणतीही स्वच्छता उपाययोजना राबवली जात नसल्याबाबत नागरिकांमध्ये नाराजी पसरली आहे.
