वणी (प्रतिनिधी): वणी नगर परिषद निवडणुकीत प्रभाग क्रमांक ५ (SC पुरुष आरक्षित) गटामध्ये संभाव्य उमेदवारांच्या नावांबाबत स्थानिक पातळीवर चर्चा रंगत आहे. २ डिसेंबरला होणाऱ्या मतदानाच्या पार्श्वभूमीवर राजकीय हालचालींना वेग आला असून विविध समाजघटकांतील कार्यकर्ते, सामाजिक क्षेत्रात सक्रिय तरुण तसेच पूर्वी निवडणूक लढवलेल्या काही व्यक्तींना पक्षांकडून उमेदवारी जाहीर झाल्याची माहिती समोर येत आहे.
रा. भीमनगर येथील ॲड. रामेश्वर लोणारे यांचे नावही संभाव्य उमेदवारांमध्ये असून पक्षाकडून त्यांची उमेदवारी जाहीर झाल्याची माहिती मिळाली आहे. प्रभागात त्यांच्या उमेदवारीबाबत मतदारांमध्ये मोठ्या प्रमाणात चर्चा सुरू आहे. काही उमेदवारांची नावे निश्चित असताना काहींच्या नावांबाबत अद्याप स्पष्टता आलेली नाही. प्रभागातील निवडणूक वातावरणात दररोज नवनवीन चर्चांना ऊत आल्याचे मतदार सांगत आहेत.
स्थानिकांच्या मते, पुढील काही दिवसांत उमेदवारींची संख्या आणखी वाढण्याची शक्यता असून यंदा मतदार अधिक सजगपणे आपला प्रतिनिधी निवडतील, अशी चिन्हे दिसत आहेत.
