यवतमाळ,दि.२९ एप्रिल २०२५: यवतमाळच्या धुळीने भरलेल्या रस्त्यांवरून प्रवास करणाऱ्या एका ऑटोचालकाच्या घरातून इतिहास घडला आहे. आदिबा अनाम ही महाराष्ट्रातील पहिली मुस्लिम महिला बनली आहे जी भारतीय प्रशासकीय सेवेत (IAS) निवडली गेली आहे. २०२४ च्या नागरी सेवा परीक्षेत १४२वा क्रमांक मिळवत तिने हे ऐतिहासिक यश मिळवले.
या यशानंतर सर्वप्रथम आदिबाने डॉ. बाबासाहेब आंबेडकरांना वंदन केले, आणि तिचा भावनिक व्हिडीओ सध्या सोशल मीडियावर जोरदार व्हायरल होत आहे.
२७ वर्षीय आदिबा पुण्यातून गणित विषयात पदवीधर आहे. दोन वेळा अपयश आल्यानंतरही तिने हार न मानता तिसऱ्या प्रयत्नात यश संपादन केले. तिचे वडील अशफाक शेख हे ऑटो रिक्षा चालक असून, अनाम लहानपणापासूनच कष्ट, चिकाटी आणि स्वप्नांची किंमत शिकत आली.
“माझ्या पालकांनी कधीच आर्थिक अडचणींना कारण होऊ दिलं नाही. शिक्षणच दारे उघडतं, हा त्यांचा विश्वास होता,” असे आदिबा सांगते. तिच्या लहानपणी मामाच्या स्वयंसेवी संस्थेत प्रशासनाशी परिचय झाल्यामुळे तिला सामाजिक बदलाच्या कामाची प्रेरणा मिळाली.
महाराष्ट्रात मुस्लिम लोकसंख्या १२ टक्के असली तरीही उच्च पदांवरील मुस्लिम प्रतिनिधित्व अत्यल्प आहे. अशा पार्श्वभूमीत आदिबाचे IASमध्ये निवडले जाणे हे केवळ वैयक्तिक यश नाही तर सामाजिक दृष्टिकोनातूनही अत्यंत महत्त्वाचे आहे.
पूर्वीही काही मुस्लिम महिलांनी नागरी सेवांमध्ये यश मिळवले आहे, परंतु IASमध्ये आदिबाची निवड ही विशेष गौरवाची बाब मानली जात आहे.
भविष्यात आदिबा शिक्षण, आरोग्य आणि महिला सक्षमीकरण यांसारख्या क्षेत्रांमध्ये कार्य करण्याची इच्छा व्यक्त करते. “मुलीने तिच्या परिस्थितीमुळे स्वप्न सोडू नयेत, हीच माझी जबाबदारी आहे,” असे ती ठामपणे सांगते.
यवतमाळमध्ये आज तिच्या घरासमोर सतत अभिमानाने पाहुण्यांची रेलचेल असते. तिचे वडील म्हणतात, आम्ही कधीच विचार केला नव्हता की माझी मुलगी दिल्लीच्या सत्ताकेंद्रात पोहोचेल. पण तिच्या मोठ्या स्वप्नांमुळे आज ती इतरांचेही जीवन घडवण्यास सिद्ध झाली आहे.
