वणी : दि. 18 मे रोजी सायंकाळी 6:15 वाजता छत्रपती शिवाजी महाराज चौक, वणी येथे एक गंभीर घटना घडली. साजिद शेख या युवकावर त्याच्या लहानशा पानटपरीमध्ये काही वेक्ती दुकानात येवून बेदम मारहाण केली, जीवे मारण्याची धमकी दिली आणि दुकानाची नासधूस केली. या हल्ल्याचा उद्देश त्याची हत्या करण्याचा होता, असा आरोप साजिद शेख ने केला आहे.
साजिद शेख याच्यावर यापूर्वीही दोनदा हल्ला झाला असून ही तिसरी वेळ आहे. अशा घटनांमुळे संपूर्ण परिसरात भीतीचे वातावरण निर्माण झाले आहे. पीडित युवकाने सोशल मीडियाच्या माध्यमातून मदतीचे आवाहन केले असून प्रशासनाकडून न्याय मिळावा, अशी मागणी केली आहे.
हल्लेखोर संबंधित वेक्ती त्या परिसरात दहशत निर्माण करत असून, सामान्य नागरिक दुकानदार यांचे जीवन असुरक्षित झाले आहे. दरवेळी झालेल्या हल्ल्यांनंतर कारवाईच्या नावाखाली पीडितालाच दोषी ठरवण्याचा प्रकार होत असल्याचा आरोप करण्यात आला आहे.
या घटनेची गांभीर्याने दखल घेऊन पोलीस प्रशासनाने तात्काळ कडक कारवाई करावी, अशी मागणी नागरिकांमध्ये जोर धरत आहे. यासोबतच व्यापारी संघटनांनी या घटनेची नोंद घेऊन पीडितास मदत करावी, असे आवाहनही करण्यात आले आहे.
