वणी (प्रतिनिधी) – वणी येथील सुपरिचित एंजल एकॅडमी व आत्मनिर्भर सामाजिक विकास संस्था यांच्या संयुक्त विद्यमाने शहरातील एस.बी. मेमोरियल हॉलमध्ये रोजगाराभिमुख प्रशिक्षण पूर्ण केलेल्या प्रशिक्षणार्थींना प्रमाणपत्र वितरण व सत्कार सोहळा उत्साहात पार पडला.
विठ्ठलवाडी व दत्तनगर येथील एंजल एकॅडमीत ब्युटी पार्लर, शिवणकाम व अन्य प्रकारचे मोफत प्रशिक्षण घेतलेल्या शेकडो होतकरू व गरजू मुलींना यावेळी प्रमाणपत्र, मोमेंटो देण्यात आले. तसेच उत्कृष्ट प्रशिक्षणार्थींना विशेष गौरव करण्यात आला.
या कार्यक्रमाचे अध्यक्षस्थान एंजल एकॅडमीच्या संचालिका व संस्थेच्या उपाध्यक्षा नमिता पाटील यांनी भूषवले. प्रमुख अतिथी म्हणून माजी नगरसेविका पौर्णिमा शिरभाते, एकविरा महिला पतसंस्थेच्या अध्यक्षा किरण देरकर, पोलीस उपनिरीक्षक अश्विनी रायबोले, हेअर आर्टिस्ट डॅनी सर (नागपूर), सिलेब्रेटी मेकअप आर्टिस्ट शबाना मोटलानी (नागपूर), हेअर आर्टिस्ट दिव्या घोडसे (मुंबई), तसेच संस्थेच्या अध्यक्षा प्रीती पाटील (नागपूर) उपस्थित होत्या.
कार्यक्रमाची सुरुवात नमिता पाटील यांच्या प्रस्तावनेने झाली. यावेळी मान्यवरांनी मुलींना प्रोत्साहित करणारे मार्गदर्शन केले. कार्यक्रमाचे सुत्रसंचालन पत्रकार सागर मुने यांनी तर आभार प्रदर्शन समाजसेवीका सुचिता पाटील यांनी केले.
या कार्यक्रमास प्रशिक्षणार्थी, पालक व नागरिक मोठ्या संख्येने उपस्थित होते. महिलांना स्वावलंबी बनवण्याच्या दृष्टीने राबवण्यात येणारे हे उपक्रम निश्चितच प्रेरणादायी ठरत आहेत.
