वणी (प्रतिनिधी) : महाराष्ट्र नवनिर्माण सेनेचे शहराध्यक्ष अंकुश बोढे यांनी दि. ४ सप्टेंबर रोजी नगर परिषद वणीचे मुख्याधिकारी यांना निवेदन देऊन एकता नगर ते तहसील कार्यालयकडे जाणाऱ्या रस्त्याची तातडीने दुरुस्ती करण्याची मागणी केली आहे.
या मार्गावर उपविभागीय अधिकारी यांचे निवासस्थान, न्यायालय, तहसील कार्यालय व बसस्थानक असल्याने नागरिक, विद्यार्थी व प्रवासी मोठ्या प्रमाणावर ये-जा करतात. मात्र रस्त्यावर पडलेल्या मोठ्या खड्ड्यांमुळे वाहतुकीत अडथळे निर्माण होत असून अपघाताचा धोका वाढला आहे. विशेषतः शाळकरी विद्यार्थ्यांना प्रचंड त्रास सहन करावा लागत आहे.
याबाबत मनसे शहराध्यक्ष बोढे यांनी प्रशासनाचे लक्ष वेधून घेत तातडीने दुरुस्तीची मागणी केली. समस्या तातडीने सोडवली नाही तर नागरिकांच्या सुरक्षेसाठी गंभीर परिस्थिती निर्माण होईल, असा इशाराही या निवेदनातून देण्यात आला आहे.
