वणी (प्रतिनिधी): वणी नगरपरिषद निवडणुकीत २ डिसेंबर रोजी मतदान होत असून, त्याअनुषंगाने प्रभाग क्र. १३ मध्ये शिवसेनेतर्फे जोरदार प्रचार रॅली काढण्यात आली.
या प्रभागात शिवसेनेचे उमेदवार रिंगणात उतरल्याने मतदारांमध्ये लक्षणीय उत्सुकता निर्माण झाली आहे. प्रभागातील नागरिकांकडून उमेदवारांना चांगला प्रतिसाद मिळत असल्याचे निरीक्षणात आले आहे.
शिवसेना स्वतःच्या बळावर ही निवडणूक लढवत असून धनुष्यबाण चिन्हावर उमेदवार उतरल्यामुळे भाजप आणि महाविकास आघाडीच्या गणितात बदल होऊ शकतो, असा अंदाज राजकीय जाणकार सूत्रांनी व्यक्त केला आहे.
दरम्यान, या प्रभागात विविध पक्षांच्या नेत्यांच्या भेटी-दौऱ्यांना वेग आला आहे.
प्रचार रॅलीदरम्यान कुणाल चोरडिया, विनोद मोहितकर, तसेच महिला (अ) गटातून किरण कुतरमारे आणि पुरुष (ब) गटातून धर्मेंद्र काकडे यांच्यासह शिवसेनेचे कार्यकर्ते मोठ्या संख्येने उपस्थित होते.
