वणी (प्रतिनिधी): वणी नगर परिषद निवडणुकीत प्रभाग क्रमांक ४ (सर्वसाधारण पुरुष) मधून सामाजिक कार्यकर्ते नारायण गोडे यांच्या संभाव्य उमेदवारीबाबत स्थानिक स्तरावर चर्चा वाढत आहे. गेल्या ३५ वर्षांपासून सामाजिक व राजकीय क्षेत्रात सक्रिय असलेल्या गोडे यांनी यापूर्वी लोकसभा व विधानसभा निवडणुका लढवल्या असून अनेकदा पराभव पत्करावा लागला आहे. राज्यातील काही राजकीय नेत्यांशी त्यांचा संपर्क असल्याची माहितीही स्थानिक वर्तुळात चर्चिली जात आहे.
यंदाच्या निवडणुकीत गोडे एका पक्षाकडून उमेदवारी मिळाल्याची अनौपचारिक चर्चा नागरिकांत सुरू झाली असून त्यामुळे मतदारांमध्ये उत्सुकता निर्माण झाली आहे. शहरातील व ग्रामीण भागातील काही गरजूंना केलेल्या मदतीमुळे त्यांच्या नावाची प्रभागात चर्चा होत असल्याचे नागरिक सांगतात. काही सामाजिक कार्यकर्ते, पुढारी आणि युवकांनीही त्यांच्या संभाव्य उमेदवारीबाबत रस दाखवल्याची माहिती मिळते.
दरम्यान, प्रभाग क्रमांक ४ मधील दोन उमेदवारांची नावे अधिकृतरीत्या जाहीर झाली असून काहींची घोषणा अद्याप बाकी आहे. त्यामुळे प्रभागात स्पर्धा वाढण्याची शक्यता व्यक्त करण्यात येत असून स्थानिक राजकीय वातावरणात चाचपणी आणि चर्चांना वेग आला आहे. मतदारांचे लक्ष संभाव्य उमेदवारांकडे लागले आहे.
