वणी : तालुक्यातील चिखलगाव येथील शेतकरी मारोती दादाजी खुसपुरे (वय ५४) यांनी माजी आमदार संजीवरेड्डी बापुराव बोदकुरवार व त्यांच्या वाहन चालकाविरोधात शिवीगाळ, जीवे मारण्याची धमकी व मारहाणीबाबत वणी पोलीस ठाण्यात लेखी तक्रार दाखल केली आहे.
खुसपुरे यांच्या म्हणण्यानुसार, दिनांक १४ मे २०२५ रोजी सायंकाळी ६ वाजता ते स्वतःच्या शेताच्या सीमारेषेवर सिमेंटचे खांब लावून कंपाऊंड करत असताना माजी आमदार संजीवरेड्डी बोदकुरवार हे त्यांच्या वाहनासह घटनास्थळी आले. त्यांनी खुसपुरे यांना अर्वाच्य शिवीगाळ करत खांब फेकून दिले. त्यानंतर त्यांच्या वाहन चालकाने खुसपुरे यांना धक्का देत शारीरिक धक्काबुक्की केली व जीवे मारण्याची धमकी दिली. ही घटना माजी आमदारांच्या उपस्थितीत घडल्याचे खुसपुरे यांनी नमूद केले आहे.
खुसपुरे यांनी पुढे सांगितले की, “माझे व माजी आमदारांचे शेत शेजारी असून ते सतत वाद निर्माण करत आहेत.
त्यांच्या राजकीय प्रभावामुळे मला व माझ्या कुटुंबीयांना जिवीतास धोका आहे.”
तक्रारीत खुसपुरे यांनी संबंधितांवर त्वरित आणि कठोर कायदेशीर कारवाईची मागणी केली आहे. पोलीस अधिक तपास करीत आहेत.
