वणी (प्रतिनिधी): वणी नगरपरिषद निवडणुकीत प्रभाग क्र. १२-ब (ST) पुरुष आरक्षित जागेतून सामाजिक कार्यकर्ते हरिदास गेडाम यांनी अपक्ष उमेदवार म्हणून उमेदवारी अर्ज दाखल केल्यानंतर प्रभागात राजकीय चर्चांना वेग आला आहे. कर्तव्यनिष्ठ, तत्पर व जनसामान्यांसाठी निरंतर कार्य करत असल्याने गेडाम यांची ओळख एक सक्रिय सामाजिक कार्यकर्ता म्हणून आहे.
प्रभाग क्र. १२ मध्ये सेवा नगर, शास्त्री नगर, सरोदय चौक, सावरकर चौक, शारदा नगर तसेच आसपासचे उपपरिसर यांचा समावेश आहे. आगामी २ डिसेंबर रोजी या प्रभागात मतदान पार पडणार आहे.
दरम्यान, हरिदास गेडाम यांच्या अपक्ष उमेदवारीला स्थानिक पातळीवर चांगला प्रतिसाद मिळत असून, पुरुष गटातील अधिकृत उमेदवारांच्या मतांवर याचा परिणाम होऊ शकतो, अशी चर्चा मतदारांमध्ये रंगली आहे. विशेषतः शास्त्री नगर परिसरात गेडाम यांच्या उमेदवारीबाबत मोठी उत्सुकता आणि चर्चा सुरू आहे.
