नागपुर/मुंबई – फ्रीशीप पोर्टलवरील तांत्रिक त्रुटीमुळे शासकीय वैद्यकीय महाविद्यालयांमध्ये शिक्षण घेणाऱ्या विद्यार्थ्यांना शैक्षणिक सवलतीपासून वंचित राहावे लागत असून, या गंभीर समस्येकडे तातडीने लक्ष देऊन सुधारणा करण्याची मागणी रिपब्लिकन पार्टी ऑफ इंडियाचे राष्ट्रीय सरचिटणीस डॉ. राजेंद्र गवई यांनी केली आहे.
राजुरा विधानसभा मतदारसंघातील सार्थक सर्वानंद वाघमारे या विद्यार्थ्याने २०२४-२५ मध्ये शासकीय वैद्यकीय महाविद्यालय, नंदुरबार येथे M.B.B.S. अभ्यासक्रमासाठी प्रवेश घेतला. यापूर्वी २०२३-२४ मध्ये त्याने शासकीय आयुर्वेदिक महाविद्यालय, नागपूर येथे B.A.M.S. अभ्यासक्रमात प्रवेश घेतलेला होता. मात्र M.B.B.S. कोर्ससाठी प्रवेश मिळाल्यानंतर त्याने B.A.M.S. कोर्स रद्द करून शासनास चार वर्षांची ट्युशन फी व एकूण फ्रीशीप रक्कम रुपये ३ लाख परत केली आहे.
तरीही समाज कल्याण विभागाच्या फ्रीशीप पोर्टलवर अशा विद्यार्थ्यांसाठी कोणताही पर्याय उपलब्ध नसल्यामुळे, M.B.B.S. अभ्यासक्रमासाठी फ्रीशीप अर्ज अपलोड करता येत नाही. परिणामी संबंधित विद्यार्थ्यांना लाखो रुपयांची ट्युशन फी भरावी लागत आहे, ही बाब आर्थिकदृष्ट्या कमकुवत विद्यार्थ्यांसाठी अत्यंत अन्यायकारक आहे.
या संदर्भात राज्याचे मुख्यमंत्री, देवेंद्र फडणवीस यांनी तातडीने लक्ष घालून समाज कल्याण विभागाच्या पोर्टलमधील तांत्रिक त्रुटी दूर करून विद्यार्थ्यांना शैक्षणिक सवलतीसाठी अर्ज करता येईल, अशी सुविधा उपलब्ध करून द्यावी, असे आवाहन डॉ. राजेंद्र गवई यांनी केले आहे.
