वणी (प्रतिनिधी) – शाळा क्रमांक ३ समोरील खुल्या मैदानातून ग्रामीण व शहरी भागातील नागरिक ग्रामिण रुग्णालय, वणी येथे जाण्यासाठी मार्गक्रमण करतात. मात्र सद्यस्थितीत या मैदानात मोठमोठे खड्डे पडले असून, पावसामुळे त्या खड्ड्यांत पाणी साचल्याने नागरिकांना आणि रुग्णांना रुग्णालयात पोहोचण्यास मोठ्या अडचणींचा सामना करावा लागत आहे.
खड्ड्यांमुळे अपघाताची शक्यता निर्माण झाली असून, रुग्ण, शाळेतील विद्यार्थी, वृद्ध नागरिक आणि महिलांना या रस्त्यावरून चालणे अत्यंत धोकादायक झाले आहे.
या पार्श्वभूमीवर वणीतील प्रशांत गाडगे, कपील मेश्राम आणि रोहित डोंगरे यांनी नगर परिषदेच्या मुख्याधिकाऱ्यांना निवेदन सादर करून सदर मैदानातील खड्ड्यांमध्ये तातडीने हार्ड मुरुम टाकण्याची मागणी केली आहे.
या समस्येवर तातडीने उपाययोजना न झाल्यास नागरिकांमध्ये तीव्र नाराजी निर्माण होण्याची शक्यता असून, प्रशासनाने लवकरात लवकर कार्यवाही करावी, अशी अपेक्षा व्यक्त होत आहे.
