वणी : आज दि. 20 मे रोजी, वणी बस स्थानकावर सामाजिक कार्यकर्ते: नारायण गोडे यांच्या पाकीट चोरीची घटना सायंकाळी 4:30 वाजता घडली. गोडे हे वणीहून मुकुटबनकडे जाणाऱ्या एस.टी. बसने प्रवास करत होते. बस अर्ध्या रस्त्यावर पोहोचल्यावर कंडक्टरने तिकिट मागितल्यावर त्यांनी पाकीट हरवल्याचे लक्षात आले.
गोडे यांनी दिलेल्या माहितीनुसार, पाकिटात अंदाजे ₹4,300 होते. त्यांनी तत्काळ पोलिसांना संपर्क करण्याचा प्रयत्न केला, परंतु कोणताही प्रतिसाद मिळाला नाही. त्यांच्या शेजारी बसलेल्या एका प्रवाशाने त्यांच्या मदतीस येत तिकिट काढून दिले.
सध्या लग्नसराईचा हंगाम सुरू असल्यामुळे वणी बस स्थानक परिसरात प्रवाशांची वर्दळ वाढली असून, त्याच बरोबर चोरीच्या घटनाही वाढल्या आहेत. ही घटना त्याचेच उदाहरण आहे.
नागरिकांनी अधिक सतर्क राहावे व पोलीस प्रशासनाने बस स्थानक परिसरात गस्त वाढवून चोरांवर कठोर कारवाई करावी, अशी मागणी होत आहे.
