▪️ चार दिवसांपासून पाण्याचा प्रश्न; दुर्गंधी व अस्वच्छतेने प्रवासी त्रस्त..
वणी (प्रतिनिधी) : वणी बसस्थानकातील स्वच्छतागृहांमध्ये मागील चार दिवसांपासून शौचास जाण्यासाठी निशुल्क असून पुरेशा सुविधा उपलब्ध नसल्याने प्रवाशांमध्ये तीव्र नाराजी व्यक्त होत आहे. त्याठिकाणी देकरेख करिता सफाई कामगार नसल्यामुळे स्वच्छतागृहात पाणी नसणे, शौचास जाण्यासाठी आवश्यक पाण्याची व्यवस्था नसणे, टाकीत पाणी नसणे, पाणी घेण्याचे बकेट-डबके नसणे, अस्वच्छता तसेच दुर्गंधी यामुळे प्रवाशांना मोठ्या गैरसोयीचा सामना करावा लागत आहे.
बसस्थानकात दररोज मोठ्या संख्येने नागरिक व प्रवासी ये-जा करतात. मात्र स्वच्छतागृहांची नियमित स्वच्छता आणि पाण्याची आवश्यक व्यवस्था होत नसल्याने परिसरात अस्वच्छ वातावरण निर्माण झाले आहे. दुर्गंधीमुळे प्रवाशांना त्रास सहन करावा लागत असून, या परिस्थितीमुळे आरोग्याचा प्रश्नही निर्माण झाला आहे.
प्रवाशांच्या मूलभूत सुविधांकडे संबंधित परिवहन विभागाने तातडीने लक्ष देऊन स्वच्छतागृहांची नियमित स्वच्छता, पाण्याची व्यवस्था आणि आवश्यक दुरुस्ती करावी, अशी मागणी नागरिकांकडून होत आहे. तसेच संबंधित लोकप्रतिनिधींनीही या समस्येची दखल घेऊन प्रवाशांना आवश्यक सुविधा उपलब्ध करून देण्यासाठी पाठपुरावा करावा, अशी अपेक्षा व्यक्त केली जात आहे.
