वणी (प्रतिनिधी): वणी नगर परिषद निवडणुकीची मतमोजणी येत्या दि. २१ डिसेंबर रोजी होणार असून, त्या अनुषंगाने शहरातील विविध भागात चर्चा सुरू आहे. विशेषतः मतमोजणी प्रक्रियेतील पारदर्शकता व तांत्रिक बाबींवर नागरिक व काही माजी उमेदवार आपली मते व्यक्त करत आहेत.
मतमोजणीदरम्यान मतमोजणी केंद्राच्या परिसरात इंटरनेट सेवा तात्पुरती बंद ठेवावी, तसेच मतदान केंद्रनिहाय एकावेळी एकच ईव्हीएम मशीन लावून मतमोजणी करण्यात यावी, अशी मागणी काही माजी उमेदवार व नागरिकांकडून व्यक्त करण्यात येत आहे. एकाच वेळी मोठ्या प्रमाणात ईव्हीएम मशीन सुरू केल्यास तांत्रिक अडचणी निर्माण होण्याची शक्यता असल्याचे मत व्यक्त केले जात आहे.
काही व्यक्तींनी २०१६ सालच्या नगरसेवक निवडणुकीतील अनुभव सांगताना, त्या वेळी एकाच वेळी अनेक ईव्हीएम मशीन सुरू केल्यामुळे आकड्यांमध्ये गोंधळ तसेच मशीनच्या लाईटबाबत तांत्रिक अडचणी जाणवल्याचा उल्लेख केला. अशा प्रकारची परिस्थिती पुन्हा उद्भवू नये, यासाठी आवश्यक ती दक्षता घेण्यात यावी, अशी अपेक्षा व्यक्त होत आहे.
दरम्यान, २०१६ साली वणी येथे ईव्हीएम संदर्भात चर्चांनंतर तहसील कार्यालयासमोर आंदोलन झाले होते, ही बाबही नागरिकांमध्ये चर्चेत आहे. त्या वेळी विविध राजकीय पक्षांच्या स्थानिक प्रतिनिधींनी निवडणूक प्रक्रियेतील पारदर्शकतेबाबत प्रशासनाकडे निवेदन दिले होते, तसेच मतपत्रिकेद्वारे निवडणूक घेण्याची मागणी मांडण्यात आली होती.
आगामी मतमोजणी प्रक्रिया शांततापूर्ण, पारदर्शक व नियमबद्ध पद्धतीने पार पडावी, अशी अपेक्षा नागरिकांकडून व्यक्त होत असून, निवडणूक प्रशासनाने सर्व आवश्यक खबरदारी घ्यावी, अशी भावना शहरात व्यक्त होत आहे.
