वणी (प्रतिनिधी): दि. १६ जुलै २०२६ रोजी जि. प. उच्च प्राथमिक सेमी इंग्रजी डिजिटल शाळा, चिखलगाव येथे शाळेच्या सर्वांगीण विकासासंदर्भात विविध विषयांवर शाळा व्यवस्थापन समितीची सभा अध्यक्षा अश्विनी धारणे यांच्या अध्यक्षतेखाली उत्साहात पार पडली.
सभेस शाळा व्यवस्थापन समितीचे उपाध्यक्ष प्रमोद गौरकार, शिक्षणतज्ज्ञ चंद्रशेखर देठे, ग्रामपंचायत सदस्या तथा शाळा व्यवस्थापन समिती सदस्या सीमा देवाळकर, सदस्य जयंत उर्फ जितू कोहळे, सदस्या पल्लवी मोरे, पूजा नेहारे, चिखलगाव केंद्राचे केंद्र समन्वयक संदीप ठाकरे, मुख्याध्यापिका प्रतिमा राखुंडे, सहाय्यक शिक्षिका अर्चना बोढे, सविता वरपटकर तसेच संगणक प्रशिक्षक वैष्णवी कुत्तरमारे उपस्थित होते.
यावेळी नवनियुक्त केंद्र समन्वयक संदीप ठाकरे, स्वयंसेवक सोनाली आवारी व संध्या जाधव यांचा शाळा व्यवस्थापन समितीच्या वतीने सत्कार करण्यात आला. तसेच शाळा व्यवस्थापन समितीचे नवनिर्वाचित सदस्य जयंत उर्फ जितू कोहळे यांचेही स्वागत करण्यात आले.
मूल्यवर्धन तासिकेच्या पाहणीसाठी आलेल्या तालुका समन्वयक करूणा खैरे यांचाही समितीतर्फे सत्कार करण्यात आला. त्यानंतर शाळा व्यवस्थापन समिती व केंद्र समन्वयक संदीप ठाकरे यांनी सर्व वर्गांची पाहणी करून विद्यार्थ्यांशी संवाद साधला.
यावेळी SIR कामाच्या पाहणीसाठी आलेले वणी पंचायत समितीचे गटशिक्षणाधिकारी स्नेहदीप काटकर यांचेही शाळा व्यवस्थापन समितीतर्फे स्वागत करण्यात आले.
सभेमध्ये शाळेच्या विकासासंदर्भातील विविध विषयांवर सविस्तर चर्चा करण्यात आली. तसेच शाळेच्या प्रवेशद्वारासमोरील रस्त्याचे काम लवकरात लवकर पूर्ण करण्यात यावे, या मागणीसाठी चिखलगाव रेल्वे गेट परिसरातील उड्डाणपुलाचे काम करणाऱ्या बांधकाम कंपनीला शाळा व्यवस्थापन समितीच्या वतीने निवेदन देण्यात आले.
