वणी (प्रतिनिधी) : अंकुशराम उर्फ युवी मोगरे (वय २४, रा. सेवानगर, वणी) या युवकाला वरोरा रोडवरील एका बारसमोर तब्बल आठ-दहा जणांनी मारहाण केली. ही घटना दि. २९ सप्टेंबर रोजी मध्यरात्री घडली. काही महिन्यांपूर्वीच युवीचे लग्न झालेले आहे.
युवीच्या मित्राकडून मिळालेल्या माहितीनुसार, मारहाणीतून बचाव करण्यासाठी तो पोलीस स्टेशनकडे धावत निघाला. मात्र त्याचा पिच्छा पुरवत हल्लेखोरांनी पोलीस स्टेशन समोरपर्यंत त्याला मारहाण केली.
जखमी अवस्थेत पोलिसांनी त्याला वणी ग्रामीण रुग्णालयात दाखल केले. डोक्याला गंभीर मार लागल्याने तो बेशुद्धावस्थेत असल्याने डॉक्टरांनी प्राथमिक उपचार करून पुढील उपचारासाठी चंद्रपूर येथे रेफर केले. घटनेची माहिती कळताच अनेक नागरिकांनी रुग्णालयात मोठ्या प्रमाणात गर्दी केली होती.
या मारहाणीत सामील असलेल्या काही युवकांना पोलिसांनी अटक केली असून काही फरार आहेत. पुढील तपास वणी पोलीस करीत आहेत.
