वणी (प्रतिनिधी): दि. ७ एप्रिल रोजी दुपारी सुमारे १ वाजण्याच्या सुमारास वणी शहरात रेती वाहतूक करणारे दोन ट्रॅक्टर भरधाव वेगाने धावत असल्याची धक्कादायक घटना घडली. साई मंदिर ते शेतकरी मंदिर तसेच ग्रामीण रुग्णालय परिसरात या ट्रॅक्टरची बेफाम धावपळ सुरू होती. या प्रकारामुळे परिसरातील नागरिकांमध्ये भीतीचे वातावरण निर्माण झाले.
दरम्यान, संबंधित ट्रॅक्टरच्या मागील भागातून मोठ्या प्रमाणात रेती रस्त्यावर सांडत असल्याचेही दिसून आले. शेतकरी मंदिर ते ग्रामीण रुग्णालय दरम्यानचा संपूर्ण प्रकार सीसीटीव्ही कॅमेऱ्यांमध्ये कैद झाला असून, रस्त्यावर साचलेल्या रेतीमुळे अनेक दुचाकी घसरल्याच्या घटना घडल्या. काही नागरिक अपघातातून थोडक्यात बचावले.
या घटनेनंतर शहरात भरदिवसा अशा प्रकारे रेती वाहतूक कशी सुरू आहे, याबाबत प्रश्न उपस्थित होत आहेत. वणी तालुक्यातील कोणत्या घाटातून ही रेती आणली जात आहे, याचीही चौकशी करण्याची मागणी होत आहे. काही घाट बंद असून काहींचा लिलाव (हरास) झालेला असतानाही मोठ्या प्रमाणावर वाहतूक सुरू असल्याने प्रशासनाच्या कार्यपद्धतीवर प्रश्नचिन्ह निर्माण झाले आहे.
तसेच या रेती वाहतुकीसाठी आवश्यक असलेली रॉयल्टी भरली आहे की नाही, याबाबतही शंका व्यक्त केली जात आहे. मागील काही वर्षांत अवैध रेती वाहतूक रोखण्यासाठी पुढे आलेल्या सामाजिक कार्यकर्त्यांवर खोट्या तक्रारी दाखल केल्याचे आरोपही स्थानिकांकडून करण्यात येत आहेत.
स्थानिकांच्या मते, काही रेती माफिया राजकीय पाठबळावर कार्यरत असून शहरात उघडपणे अवैध वाहतूक सुरू आहे. या व्यवसायात गुन्हेगारी पार्श्वभूमी असलेल्या व्यक्तींचाही सहभाग असल्याची चर्चा आहे.
नदी घाटांवर कोणतेही ठोस नियंत्रण नसल्याचे चित्र असून, प्रशासनाने या प्रकाराची गांभीर्याने दखल घेऊन तातडीने कठोर कारवाई करावी, अशी जोरदार मागणी नागरिकांकडून करण्यात येत आहे.
