वणी : इंटरनॅशनल कौन्सिल (International Council), ठाणे यांच्या वतीने आयोजित करण्यात आलेला भव्य पुरस्कार वितरण सोहळा नुकताच दिल्ली येथे उत्साहपूर्ण वातावरणात पार पडला. या सोहळ्यात महाराष्ट्रातील विविध क्षेत्रांत उल्लेखनीय कार्य करणाऱ्या व्यक्तींचा सन्मान करण्यात आला.
यावेळी चंद्रपूर जिल्ह्यातील वरोरा तालुक्याचे रहिवासी रमेश महादेवराव राजूरकर यांच्या सामाजिक व जनकल्याणकारी कार्याची दखल घेऊन त्यांचा विशेष सत्कार करण्यात आला. जागतिक स्तरावर उत्कृष्ट कामगिरी करणाऱ्या विविध क्षेत्रांतील मान्यवरांना या कार्यक्रमात पुरस्कार व सन्मानचिन्ह प्रदान करण्यात आले.
या पुरस्कार सोहळ्याचा मुख्य उद्देश सामाजिक कार्य, शिक्षण, व्यवसाय, नाविन्यपूर्ण उपक्रम तसेच मानवकल्याणासाठी योगदान देणाऱ्या व्यक्ती व संस्थांच्या कार्याचा गौरव करणे हा होता. कार्यक्रमाला आंतरराष्ट्रीय स्तरावरील मान्यवर, उद्योगपती आणि विविध क्षेत्रांतील तज्ज्ञांची उपस्थिती लाभली.
इंटरनॅशनल अवार्ड कौन्सिल इंडियाच्या विश्वस्त मंडळाशी संबंधित सदस्य व प्रशासनाच्या वतीने रमेश राजूरकर यांना कुटुंबीयांसह सन्मानित करण्यात आले. यावेळी बोलताना त्यांनी, “मानवाने मानवाची सेवा केली तर जनकल्याण साध्य होईल आणि मानवाच्या उन्नतीतून राष्ट्राची उन्नती होत राहील,” असा आशावाद व्यक्त केला.
रमेश राजूरकर यांच्या या सन्मानामुळे वरोरा तालुक्यासह चंद्रपूर जिल्ह्याच्या शिरपेचात मानाचा तुरा रोवला गेला असून विविध स्तरांतून त्यांच्यावर अभिनंदनाचा वर्षाव होत आहे.
